القائمة الرئيسية<<

محرك البحث<<

أقسام الاخبار<<

أهم الاخبار<<

إحصائيات<<

المتواجدون حالياً<<

موقع الشؤون الايزيدية » الأخبار » القسم الكوردي

ئاواتی به‌دینه‌هاتوو
بواسطة: ezidi بتاريخ : الأربعاء 28-07-2010 07:24 مساء

ئاواتی به‌دینه‌هاتوو ‌ ستران عه‌بدوڵڵا‌ وه‌ك هه‌موو نه‌وجه‌وان و گه‌نجی هه‌شتاكان، منیش حه‌زم له‌ده‌نگی حه‌مه‌جه‌زا بوو، ئێستاش ،كه‌ له‌ چاو گه‌نجه‌ بزێوه‌كانی ئه‌مڕۆ له‌ڕووم نایه‌ بڵێم گه‌نجم، هه‌روا حه‌زم له‌ده‌نگێتی. بۆ شارێكی ته‌عریبكراو گوێگرتن له‌گۆرانی شیلانه‌و كیژی كوردستان و به‌دزییه‌وه‌ گوێگرتن له‌ (خوشكه‌ له‌یلاو كوردستانه‌ كوردستانه‌) سه‌بوورییه‌كی گه‌وره‌ بوو، ئه‌م حه‌زه‌ بووه‌ ئاواتی ئه‌وه‌ی رۆژێك بتوانم له‌گه‌ڵ كاكه‌ حه‌مه‌دا بدوێم، نامه‌ی بۆ بنووسم،  یان وێنه‌یه‌كی بۆ یادگاری له‌گه‌ڵدا بگرم. نازانم ئه‌و كاته‌تان له‌ بیره‌ هه‌ندێك هونه‌رمه‌ند كڵێشه‌ی نامه‌یه‌كیان ئاماده‌كردبوو كه‌ له‌سه‌ره‌وه‌ وێنه‌ی خۆیانء له‌ناوه‌رۆكیشدا سوپاسء سلاوكردن بوو بۆ دۆستان و خۆشه‌ویستانی ده‌نگء هونه‌ر، دیاربوو دۆستێكم نامه‌ی بۆ هونه‌رمه‌ند محه‌مه‌د جه‌زا نووسیبوو، نامه‌ وه‌لامی هاته‌وه‌: چه‌ند وشه‌یه‌كی جوان و سوپاسگوزاری له‌گه‌ڵ ئیمزاو وێنه‌یه‌كی كاك محه‌مه‌د. وازم نه‌هێناو هه‌دادانم نه‌بوو تا ئه‌و دۆسته‌ به‌ ناچاریی نامه‌ی دۆستایه‌تی به‌دیاری دایه‌ من، هه‌ر بۆ سه‌بووری ناوی ره‌فیقه‌كه‌م لابردو ناوی خۆم له‌جێی دانا. ئیتر بوومه‌ خاوه‌نی نامه‌ی هاتوو له‌ كاكه‌ حه‌مه‌وه‌. چه‌ند خۆشبوو به‌و ته‌مه‌نه‌وه‌ نامه‌ی هونه‌رمه‌ندێكی گه‌وره‌ت پێبگات! دڵم ئاوی نه‌خوارده‌وه‌، ئاواتێكم مابوو كه‌ وێنه‌كه‌ بگرم، رێك له‌سه‌ره‌تای هه‌شتاكان بوو كه‌ بیستم محه‌مه‌د جه‌زا دێته‌ شایی و گۆڤه‌ندی دۆستێكی له‌كه‌ركوك، ده‌وروبه‌ری ماڵه‌ كه‌ركوكی جمه‌ی ده‌هات له‌و ئۆگرانه‌ی شه‌یدای دیداری هونه‌رمه‌ندی دڵخوازی خۆیان بوون، مه‌سافه‌ی نێوان ماڵی میوان و كۆلانه‌كه‌ی ئێمه‌ ته‌نها دوو كۆلان بوو، لێ به‌بیانووی ئه‌وه‌ی ته‌مه‌نم بچووكه‌و برای نازداری سێ خوشكی له‌ خۆم گه‌وره‌ترم نه‌یانهێشت بچمه‌ ناو قه‌ره‌باڵغی شاییه‌وه‌. ئه‌و ئاواته‌م پێچایه‌وه‌، راپه‌ڕین هات كه‌ ڕاپه‌ڕینی به‌دیهاتنی زۆر ئاوات بوو، رۆژی ئاواته‌كه‌ی منیش هات: رۆژێك له‌و رۆژگارانه‌ی له‌ حكومه‌ت كارم ده‌كرد كاك محه‌مه‌د میوانی حكومه‌ت بوو، پێش دیداری له‌گه‌ڵ سه‌رۆكی حكومه‌تدا  له‌ په‌یوه‌ندییه‌كان به‌خێرهاتنمان كرد، هه‌له‌و هاتۆته‌ ده‌ست كه‌ ئاواتم به‌دی بێت:  كاكه‌ حه‌مه‌ ده‌توانم ره‌سمێكت له‌گه‌ڵ بگرم؟ ئێستاو ئه‌وساش نازانم ئه‌و ره‌سمه‌م بۆ نه‌دیته‌وه‌؟ سووتا یان فه‌وتا، نازانم؟    ئه‌مڕۆ هه‌لێكی تر هه‌ڵكه‌وت كه‌ له‌گه‌ڵ دۆستانی بنكه‌ی گه‌لاوێژدا سه‌ردانی (كاكی پێشمه‌رگه‌) بكه‌ینه‌وه‌، له‌ ته‌ندروستی بپرسین و گوڵی هیواو ئاواتی چاكبوونه‌وه‌ی بۆ ببه‌ین، هه‌ڵبه‌ت هه‌م هونه‌ردۆستان و هه‌میش هه‌موو ئۆگرانی ده‌نگی كاكه‌ محه‌مه‌دو هه‌موو كه‌سێكی شه‌ره‌فمه‌ندی ئه‌م ولاته‌ كه‌ ڕێز له‌ هونه‌رو له‌ پێشمه‌رگه‌و كوردایه‌تی ده‌نێت، دوعای چاكبوونه‌وه‌ی زووتر بۆ كاكه‌ محه‌مه‌د ده‌خوازێت، ئومێدی ئه‌وه‌ ده‌كه‌ن زوو رابێته‌وه‌، زوو بێته‌وه‌ كۆڕی هونه‌رو ئه‌فراندن له‌ مه‌قام تا به‌سته‌، له‌ سروود تا گۆرانی ئه‌وین و ژیانمان بۆ بڵێته‌وه‌. من ئاواتێكی تایبه‌تیشم هه‌ر له‌دڵدا ماوه‌:  كاكه‌ حه‌مه‌كه‌ی جاران زوو چاكبێته‌وه‌، زوو به‌دیداری شادببمه‌وه‌و ده‌رفه‌ت له‌ باربێت وێنه‌یه‌ك بۆ یادگاری بگرین. سا ئه‌و كاته‌ به‌هه‌توانی ئازادی ساڕێژ ده‌بێ برینی نامورادی

مرات القراءة: 37 - التعليقات: 0

المشاركة السابقة : المشاركة التالية